எங்கள் வானகமே ! குளிர்ந்த நீரே !
அம்பரமே !
தண்ணீரே ! சோறே ! அறஞ்செய்யும்,
.........எம்பெருமான் நந்த கோபாலா !
எழுந்திராய் !
கொம்பனார்க்கு எல்லாம் கொழுந்தே !
குலவிளக்கே !
.........எம்பெருமாட்டி யசோதா ! அறிவுறாய் !
அம்பரம் ஊடறுத்து ஓங்கி உலகளந்த,
.........உம்பர் கோமானே !
உறங்காது எழுந்திராய் !
செம்பொன் கழலடிச் செல்வா பலதேவா !
.........உம்பியும் நீயும் உறஙகு ஏல் ஓர் எம்பாவாய் !
----------------------------------------------------------------------------------------------------------
பொருள்:-
----------------
எங்கள் வானகமே ! தண்மை பொருந்திய நீரே ! அமுதமாய்த் திகழும் சோறே ! தருமத்தை நிலைநாட்டி உய்விக்க வந்த எம்பெருமானே ! நந்தகோபாலா ! எழுந்திராய் ! மங்கையர்க்கெல்லாம் மருக்கொழுந்து போன்ற குல விளக்கே ! எம்பெருமாட்டி ! யசோதா ! கேளம்மா ! வானத்தை முட்டி , மோதி இடித்து, ஓங்கி உலகளந்த தேவ தேவனே ! உறங்காது எழுந்திரு ! ஏ ! பலதேவா ! கண்ண பெருமானின் அண்ணனே ! செம்பொன் திருவடிச் செல்வா ! நீயும் உன் தம்பி கண்ணனும் உறங்கியது போதும்; எழுந்து வாருங்கள் !
-----------------------------------------------------------------------------------------------------------
சொற்பொருள்:-
-------------------------
அம்பரம் = வானம்; தண்ணீர் = குளிர்ந்த நீர்; சோறு = அமுதம் போன்ற அடிசிலே !; எழுந்திராய் = எழுவாயாக; கொம்பனார் = பெண்கள்; கொழுந்து = மருக்கொழுந்து; எம்பெருமாட்டி = எமது தலைவி; அறிவுறாய் = கேளாய்; அம்பரம் = வானம்; ஊடு அறுத்து = முட்டி, மோதி, இடித்து, உயர்ந்து உயர்ந்து சென்று ; ஓங்கி = நெடிய உருவம் எடுத்து; உலகு அளந்து = ஒரு காலை இந்த உலகத்திலும் மறுகாலை மாவலியின் தலை மீதும் வைத்து, இந்தப் பேருலகத்தையே அளந்த; உம்பர் = தேவர்கள்; கோமானே = தலைவனே; உறாங்காது எழுந்திராய் = உறங்கியது போதும், எழுந்து வாராய்; செம்பொன் = சிவந்த பொன் போன்ற ; கழல் அடி = கழல் என்னும் அணிகலன் அணிந்த காலகளை உடைய செல்வனே; உம்பியும் = உன் தம்பியும்; உறங்கேல் = இனியும் உறங்காதீர்கள்; எழுந்து வாருங்கள் !
------------------------------------------------------------------------------------------------------------
{ சோறு என்பது தான் தமிழ்ச் சொல் – சாதம் என்பது வடசொல் – ஆண்டாள், சாதம் என்று சொல்லாமல் சோறு என்று சொல்லி இருப்பதைக் கருத்தில் கொள்ளுங்கள் தமிழர்களே ! }
-------------------------------------------------------------------------------------------------------------
ஆக்கம் + இடுகை:
வை.வேதரெத்தினம்,
ஆட்சியர்,
தமிழ்ப் பணி மன்றம்.
[தி.ஆ: 2049, சிலை,16.]
{31-12-2018}
-------------------------------------------------------------------------------------------------------------
“தமிழ்ப் பணி மன்றம்” முகநூற் குழுவில் வெளியிடப் பெற்ற
கட்டுரை !
-------------------------------------------------------------------------------------------------------------
கருத்துகள் இல்லை:
கருத்துரையிடுக
உங்கள் கருத்துகள் வரவேற்கப்படுகின்றன .