புதிய தமிழ்ச் சொல் (37) உருளி ( CYCLE )

புதுச்சொல்புனைவோம் !

உருளி = CYCLE
------------------------------------------------------------------------------------------

மேலை நாட்டினரால் கண்டுபிடிக்கப் பெற்ற “சைக்கிள்” வண்டிக்கு இரண்டு சக்கரங்கள் உடைய வண்டி என்ற கருத்தில் “பை-சைக்கிள்” என்று பெயரிடப்பட்டது. காலப் போக்கில் “பை-சைக்கிள்” மறைந்து “சைக்கிள்” என்ற சொல் நிலைபெற்று விட்டது !

“பை-சைக்கிள்” என்பதை தமிழில் மொழிபெயர்த்த வடமொழி ஆர்வலர்கள் அதை ”துவிச்சக்கர வண்டி” என்றனர். பின்னாளில் அது “இரு சக்கர வண்டி” ஆயிற்று. வேறு சில தமிழறிஞர்கள் அதை “மிதி வண்டி” என்று அழைக்கலாயினர் !

---

தனித்தமிழில் ஈடுபாடு கொண்ட அறிஞர்கள் அதை “ஈருருளி” என்று மொழியாக்கம் செய்தனர். இரு + உருளி = ஈருருளி என்றாகும். ஈருருளி என்றால் இரண்டு உருளிகள் (சக்கரங்கள்) உடைய வண்டி என்று பொருள் !

“பை-சைக்கிள்” என்ற சொல் சுருங்கி “சைக்கிள்” ஆகிவிட்டது. பேச்சு வழக்கிலும், எழுத்து வழக்கிலும் “சைக்கிள்” என்ற சொல்லே நிலை பெற்றுவிட்டது. எனவே நாமும் ”ஈருருளி”யைக் கைவிட்டு “உருளி” என்றே உரைப்போமே !

சரி ! “உருளி” என்ற சொல் பொருத்தம்தானா ? ஆம் எனில் எப்படி ? “உல்” என்னும் வேர்ச்சொல் “வளைதல்” கருத்தை உணர்த்தும். “உல் என்னும் வேரினின்று கிளைத்து, நீண்டு, திரிபடைந்து பல்வேறு சொற்கள் தமிழில் புழங்கி வருகின்றன. அவற்றுள் ஒன்று தான் “உருளி”. எப்படி ? உல் > உர் > உருள் > உருளி = (வளைதற் கருத்தை உணர்த்தும்) வட்ட வடிவமான ஆழி, அதாவது சக்கரம் என்று பொருள் !

“சைக்கிள்” என்னும் ஆங்கிலச் சொல்லுக்கு மிகச் சரியான மொழியாக்கம் “உருளி” என்பதே ! ஆகையால் “சைக்கிள்” என்பதை இனி “உருளி” என்றே சொல்வோம். “உருளி” யின் உறுப்புகள் பெயரெல்லாம் ஆங்கிலத்தில் இருக்கிறதே ! அவற்றையும் தமிழில் மொழியாக்கம் செய்ய வேண்டாமா ? செய்திருக்கிறோம் ! பாருங்களேன் !!

 

=================================================

CYCLE	= உருளி
CYCLE - FRAME	= பழுவம் (பழு > பழுவம்)
CYCLE - FORK	= கவைக்கால்
CYCLE - WHEEL	= ஆழி
CYCLE - RIM	= வட்டகை
CYCLE - WHEEL SPOKE	= ஆரை (ஆரக்கம்பி)
CYCLE - WHEEL HUB	= குடம் (ஒ.நோ: வண்டிக்குடம்)
CYCLE - HUB PLATE	= குடமூடி
CYCLE- - WHEEL AXLE	= இருசு
CYCLE - AXLE CONE	= குவிசுரை
CYCLE - TYRE	= தூம்புறை (தூம்பு + உறை)
CYCLE - CHAIN	= சங்கிலி
CYCLE-  PEDAL	= மிதியடி
CYCLE - CRANK WHEEL	= ஏராழி (ஏர் + ஆழி)
CYCLE - CRANK SHAFT	= ஏர்க்கால் (ஏர்=எழுதல்)
CYCLE - FREEWHEEL	= முள்ளாழி
CYCLE - CARRIER	= சுமைதாங்கி
CYCLE - MUD-GUARD	= மட்காப்பு
CYCLE - DANGER LIGHT	= சிவலை விளக்கு
CYCLE - REFLECTOR	= சொலிப்பு வில்லை
CYCLE - STAND	= உருளித் தளி
CYCLE - BRAKE	= தடையம்
CYCLE - BRAKE SHOE	= தடையக் கட்டை
CYCLE - BALLS	= பரல்கள்
CYCLE – BELL	= மணி
CYCLE - SADDLE	= இருக்கை
CYCLE- DYNAMO	= ஈமின்கூடு
CYCLE - DOOM	= குடவிளக்கு
CYCLE PARKING STAND	= உருளி நிறுத்தகம்
CYCLE REPAIR SHOP	= உருளிச் சீரகம்
CYCLE - OVERHAULING	= முற்றாய்வு.

 

==================================================== 

ஆக்கம் + இடுகை,

வை.வேதரெத்தினம்,

(veda70.vv@gmail.com)

ஆட்சியர்,

‘தமிழ்ப் பணி மன்றம்” முகநூல்.

{06-03-2016}

=====================================================

உருளி

புதிய தமிழ்ச் சொல் (36) வில்லூரி ( MART, STORES, STALL, EMPORIUM,SHOP )

புதுச் சொல் புனைவோம் !

வில்லூரி = EMPORIUM, MART, STORES

-----------------------------------------------------------------------------------------

“உல்” என்னும் வேர்ச் சொல் உள்ளொடுங்கும் கருத்தை உணர்த்துவது. உள்ளொடுங்கல் என்றால் குறிப்பிட்ட வரம்புக்குள் அடங்குதல் என்று பொருள்!

 

உல் > உர் > ஊர் = நாற்புறமும் எல்லைகளைக் கொண்டு, அவ்வெல்லைகளுக்கு உள்ளொடுங்கி அமைவதால் தான் அதற்கு “ஊர்” என்று பெயர். சிற்றூர், பேரூர் எதுவாக இருந்தாலும், நாற்புறமும் எல்லைகளைக் கொண்டு அவற்றுக்கு இடையே தானே அவை அமைகின்றன ! 

 

”உல்” எனும் வேர்ச்சொல், உல் > உர் > ஊர் > ஊரி என்று திரிந்து “குறிப்பிட்ட வரம்புகளுக்கு உட்பட்டு அமைந்துள்ள இடம்“ என்ற பொருளை உணர்த்தும் ! 

---

 

கல் + ஊரி = கல்லூரி. கல்லூரி என்ற சொல் இங்கு எதைக் குறிக்கிறது ? நாற்புறமும் குறிப்பிட்ட எல்லைகளை உடைய வளாகத்தில் (CAMPUS) அமைந்துள்ள கல்வி கற்பிக்கப்படும் கட்டடப் பகுதியைக் குறிக்கிறது அன்றோ ? இதிலிருந்து என்ன உணரப்படுகிறது ? 

 

“ஊரி” என்பது இளமை, சங்கு, முகில், புல்லுருவி ஆகிய கருத்துகளுடன் “இடம்” என்ற கருத்தையும் நமக்கு உணர்த்துகிறது. “ஊரி” என்பதை “இடம்” என்னும் சொல்லுக்குப் பகரமாக (பதிலாக) வைத்து வேறு பல சொற்களையும் நாம் உருவாக்க முடியும் !

 

வில் + ஊரி = வில்லூரி. பொருள்கள் விற்பனை செய்யப்படும் இடத்தை வில்லூரி எனச் சொல்வது பொருத்தம் தானே ? இப்போது MART, STORES, SHOP, STALL, EMPORIUM என்று பல்வேறு பெயர்களில் அழைக்கப்படும் “விற்பனையகங்களை” இனி “வில்லூரி” என்னும் ஒரே சொல்லால் அழைப்போமே !

 

===================================================----

 

FURNITURE MART..............	= அறைகலன் வில்லூரி
STATIONARY MART............	= எழுதுபொருள் வில்லூரி
BOOK SHOP...........................	= புத்தக வில்லூரி
FRUIT STALL........................	= தேங்கனி வில்லூரி
TEA STALL............................	= தேநீர் வில்லூரி
GROCERY STORES.............	= உண்பொருள்வில்லூரி
MEDICAL  STORES.............	= உறைபொருள் வில்லூரி
FANCY STORES.....................	= புனைபொருள் வில்லூரி
UTENZIL STORES.................	= அடுகலன் வில்லூரி
GLASS SALES EMPORIUM..	= கண்ணாடி வில்லூரி
COMPUTER SALES EMPORIUM.............................	= கணினி வில்லூரி
HAND LOOM TEXTILES......	= கைத்தறித் துணி வில்லூரி

 

===================================================

 

கொல் + ஊரி = கொல்லூரி. ஆங்கிலத்தில் SLAUGHTER HOUSE என்று சொல்வதை ஆட்டுத் தொட்டி, மாட்டுத்தொட்டி என்றும் மிருகங்கள் வதைப்பிடம் என்றும் பலவாறு சொல்கிறோம். இதை “கொல்லூரி” என்ற ஒரே சொல்லால் குறிப்பிடலாம்.

 

SLAUGHTER HOUSE........................= கொல்லூரி

இது போன்ற புதுச்சொற்களை இன்னும் புனைவோம் ! தமிழில் சொல் வளத்தைப் பெருக்குவோம்!!

 

===================================================

 

ஆக்கம் + இடுகை,

வை.வேதரெத்தினம்,

(veda70.vv@gmail.com0

ஆட்சியர்,

“தமிழ்ப் பணி மன்றம்” முகநூல்.

{06-03-2016}

 

====================================================

வில்லூரி