name='description'/> தமிழ்ப் பணி மன்றம்: கவிதை (38) (1970) அன்புடன் அருள் தவழும் அவை ! (மா.சு.இராமமூர்த்தி)

ஞாயிறு, அக்டோபர் 20, 2019

கவிதை (38) (1970) அன்புடன் அருள் தவழும் அவை ! (மா.சு.இராமமூர்த்தி)





            கொத்து (01)                                                                  மலர் (044)
------------------------------------------------------------------------------------------------------------------------------------
புதுக்கோட்டையில் ஒரு திங்கள்மட்டும் பணியாற்றிவிட்டு
இடமாற்றலில் கோவை செல்லும் முதல்வர்
மா.சு.இராமமூர்த்திக்கு அளித்த தேனீர் விருந்தின்போது
நான் ஆற்றிய உரை !
(ஆண்டு 1970)
----------------------------------------------------------------------------------------------

        அன்புடன்         அருள்தவழும்    அவைத்தலைவர் அவர்கட்கும் !
        அமைதியுடன்    எனதுரையைச்   செவிமடுக்கும்    நண்பர்க்கும் !
        இன்றுடன்        இம்மன்றத்       தலைமைபெறும் தகையோர்க்கும் !
        இனிமையுடன்    சுவையுண்டி      ஈங்குதந்தப்       பேரவைக்கும் !
        தலைவணங்கிக் கரம்குவித்துத்    தருகின்றேன்     வணக்கம் !
        தகைமையுடன்   ஏற்றிடுக !        தமிழ்த்தாயே     வாழ்த்து !
------------------------------------------------------------------------------------------------------------

               காரிருள்         கரைந்து          வெள்ளிக்
                                  கதிரொளி         வானில்          தோன்ற,
               கூரிய            அலகைக்         கூப்பி,
                                  கூவிடும்          கரிச்சான்         குஞ்சு !
               ஆரிரோ           பாடும்            பெண்டிர்,
                                  ஆடவர்           உறக்கம்          நீங்க,
               பாருள            உயிர்கள்         வாழ்க்கைப்
                                  பயணத்தைத்     தொடரும்         நேரம்,
               பரிதியோன்       வந்தால்          என்ன ?
                                  பசுங்கதிர்         சுட்டால்          என்ன ?
               காரியம்          வேறே            இல்லை ,
                                  கண்துயில்       நீங்கோம்         என்று ,
               சீரிய              கடமை           கண்டும் ,
                                  சிந்தனை         பிறழ்வோர்       தம்மை
               கூரிய            கதிராம்           அம்பை
                                  குணதிசைக்      கதிரோன்         வீசி
               புரிதுயில்         மாந்தர்           தம்மை ,
                                  புறங்கொளச்     செய்தல்          போல,
               எழுகதிர்          தாங்கள்          வந்து ,
                                  எழுப்பினை      துயில்வோர்      தம்மை !
               விழுகதிர்         வேகம்            கண்டு ,
                                  விழிமலர்         நொந்தார்         எல்லாம் ,
               கழுமுனை       ஏற்றி             நீதி ,
                                  காத்தவர்         நீவிர்             அன்றோ ?
               உழுபடைக்       கலனைக்         கொண்டு
                                  உறக்கமே         கலையார்        நெஞ்சை ,
               கொழுமுனைச்   சொற்கள்         தம்மால் ,
                                  குதறிய           செயலால்        இன்று ,
               எழில்மணிக்      கலசம்            போன்ற ,
                                  எம்மனோர்       உள்ளம்           தன்னில் ,
               அழியொணாக்    காவிய           மாக
                                  ஆழமாய்ப்        பதிந்ததும்        என்னை ?
               பழிமொழி        கூறும்            மாந்தர்
                                  பகைமையைப்   பெறினும்         தனது
               வழிதனில்        பிறழாத்          தங்கள்
                                  வலிமையை     வாழ்த்தும்        எம்மோர் ,
               குழிவிழும்       கன்னம்           தன்னில் ,
                                 குறுநகை         குலவச்           செய்து
               பழகிய            தாங்கள்          இன்று
                                  பறந்திடும்        நிலைதான்       என்னை ?
               மொழிபல        கூறி              எம்மை
                                  முதனிலைப்      படுத்தும்          தாங்கள் ,
               தழுவிய          நிலைதான்       என்னை ?
                                  தாங்கொணாத்   துன்பம் !          துன்பம் !
               விழிக்கடை       நீரைச்            சுண்டி
                                   விடைதரும்      எம்மைத்          தங்கள் ,
               சுழிமனச்         சூழல்             தன்னில்
                                  சூழ்ந்திட          உரிமை           தாரீர் !
               அழிமணல்       அடிகள்           அல்ல ,
                                  அன்புசால்        தங்கள்           நினைவு !
               வழுவழுப்        பளிங்குக்         கல்லில்
                                  வடித்தநற்        சிற்பம்            அன்றோ ?

----------------------------------------------------------------------------------------------------------

          வானுயர்ந்த      கோடுதனில்      குடியிருக்கும்     கூடு    அது
              வழங்குகின்ற     தேன்சுவையை    அறிந்தொழுகல்          பீடு !
          கானடர்ந்த       பூமிதனில்        ஓடிவரும்         ஆறு  -  அதில்
              கலந்துவரும்     மருந்துணவு      மாந்துபவர்       பேறு !
          மானிடரின்       வாழ்வுதனில்     கூடிவரும்        இன்பம்  -  சிறு
              மலரனையக்     கூம்பிவிடும்      மறுபொழுதோ       துன்பம் !
          கனியுறங்கு  மணிவிதையாய்  மெய்ப்பொருள்கள்  கோடி - உலகில்
              கற்றுணர்ந்து     வழிநடத்தும்     நற்பணிகள்       நாடி !
          நனிசிறந்த        எண்ணமதை     நெஞ்சமதில்      ஏந்தி  -  இங்கு
              நடந்துவந்த      எந்தலைவா !     பிரிந்தனையே     நீந்தி !
          பனிமலரும்      கதிரவனும்       உறவுகொளல்    போல  - தாங்கள்
              பழகிவிட்டுப்      பிரிவதனால்     வருந்துகிறோம்      சால ! 

-------------------------------------------------------------------------------------------------------------



                        அன்னத்தின்        தூவி         போல,
                             அனிச்சப்பூ       இதழைப்       போல,
                        வண்ணங்கள்      காட்டும்       நீல
                             வான்பனி         நீரைப்          போல,
                        நெருஞ்சியின்      மலரைப்      போல,
                             நீள்கடல்          நுரையப்        போல,
                        அருந்தமிழ்         நெஞ்சம்       கொண்ட
                             ஐயன்மீர்          வணக்கம் !     நன்றி !


------------------------------------------------------------------------------------------------------------

ஆக்கம் + இடுகை,
வை.வேதரெத்தினம்,
[veda70.vv@gmail.com]
ஆட்சியர்,
தமிழ்ப் பணி மன்றம் முகநூல்.

-----------------------------------------------------------------------------------------------------------




கருத்துகள் இல்லை:

கருத்துரையிடுக

உங்கள் கருத்துகள் வரவேற்கப்படுகின்றன .