புதிய தமிழ்ச் சொல் (15) ஊதைப் பொறி ( AIR COOLER )

புதுச் சொல் புனைவோம் !

AIR  COOLER  = ஊதைப் பொறி

---------------------------------------------------------------------------------------------------------

கோடை காலத்தில் வீட்டுக்குள் வெப்பம் மிகுதியாக இருக்கும். மின் விசிறி எவ்வளவு சுழன்றாலும் காற்றுதான் வருமே தவிர – அதுவும் வெப்பக் காற்று தான் வருமே தவிர – குளிர் காற்றுக் கிடைக்காது. குளிர் காற்றை விரும்புவோர், ஏர் கூலரைப் பயன் படுத்துகிறார்கள். ஏர் கூலர் என்பதைத் தமிழில் எப்படிச் சொல்லலாம் ?

வாடைக் காற்றுக்கு குளிர்ச்சி மிகுதி. தமிழில் இதை ஊதைக் காற்று என்று சொல்வார்கள்.

========================================

வரைமல்க, வானம் சிறப்ப, உறைபோழ்ந்து

இருநிலம் தீம்பெயல் தாழ – விரைநாற

ஊதை உளரும் நறும்தண்கா பேதை

பெருமடம் நம்மாட்டு உரைத்து !

========================================

(நூல் : கார் நாற்பது. பாடல் எண் : 30)

========================================

பொருள் :

-----------------

கலைகள் வளம் நிறைய, வானகம் சிறப்பு எய்த, இனிய மழை பொழிய, எங்கும் நறுமணம் கமழ, ஊதைக் காற்றானது, தலைவியின் அழகையும் இளமையையும் நமக்குச் சொல்ல மலர்ச் சோலையில் காத்துக் கொண்டிருக்கிறது. தேரினை விரைந்து செலுத்துவாயாக !

==========================================================

” ஊதை “ என்ற சொல்லாட்சி குளிர் காற்றின் குணத்தை இங்கு குறிப்பிட்டுக் காட்டுகிறது. ஏர் கூலர் என்பதை இனி நாம் ஊதைப் பொறி என்றே சொல்லிப் பழகுவோம்.

==========================================================

----------------------------------------------------------------------------------------------

ஆக்கம் + இடுகை,

வை.வேதரெத்தினம்

(veda70.vv@gmail.com)

ஆட்சியர்,

”தமிழ்ப் பணி மன்றம்” முகநூல்.

----------------------------------------------------------------------------------------------