'ஒரு காலடி, நாலிலைப் பந்தலடி' !
கம்பர் ஒருமுறை ஔவையாரிடம் ஒரு விடுகதை
சொல்கிறேன்.
புதிரை விடுவியுங்கள் பார்க்கலாம் என்று கூறி 'ஆரை' என்னும் கீரையைக் குறிப்பதாகப்
பொருளை உள்ளடக்கி கீழ்க்
கண்டவாறு சொன்னார்:-
------------------------------------------------------------------------------------------------------------
பாடல்
------------------------------------------------------------------------------------------------------------
'ஒரு காலடி, நாலிலைப் பந்தலடி'
ஒரு கால் அடி நாலிலைப் பந்தல் அடி
------------------------------------------------------------------------------------------------------------
இதை இவ்வாறு பிரித்து அமைத்துப் பொருள் காண்க !
அடி ஒரு கால்; அடி நாலிலைப் பந்தல்.
(பந்தல்) அடி(யில்) ஒரு கால்; அடி(போன்ற) நாலிலைகள்
உடைய பந்தல்
------------------------------------------------------------------------------------------------------------
தாங்கி நிற்கும்
வகையில் அடியில் (கீழே) ஒரு
கால் (தூண்) இருக்கும் ! மேலே கால் அடியைப் போல வடிவம் கொண்ட நான்கு இலைகள் உடைய பந்தல் இருக்கும் (அது என்ன ?)
-------------------------------------------------------------------------------------------------------------
சொற்பொருள்;-
ஒரு காலடி = ஒரு
கால் இருக்குமடி; நாலிலை = நான்கு
இலைகள் உடைய ; பந்தலடி = பந்தல் போன்று
இருக்குமடி! (அது என்ன?)
இதில் வரும் 'அடி' என்னும் சொல் ஔவையாரை
மதிப்புக் குறைவாக விளிக்கும் வகையில் இடக்கராக வைத்துப் புதிரைக் கூறினார்.
ஔவையாரிடமா கம்பரின் இடக்கு
செல்லுபடியாகும்?
ஔவையார்
உடனே பாடினார்:-
------------------------------------------------------------------------------------------------------------
பாடல்
------------------------------------------------------------------------------------------------------------
எட்டேகால் லட்சணமே, எமனேறும் பரியே,
மட்டில் பெரியம்மை வாகனமே, - முட்டமேல்
கூரையில்லா வீடே, குலராமன் தூதுவனே,
ஆரையடா சொன்னாயடா!
-----------------------------------------------------------------------------------------------------------
பொருள்:- (01)
அடேய் ! அவலட்சணம் பிடித்தவனே ! எருமைக் கடாவே ! கழுதையே !; குட்டி
சுவரே !; குரங்கே !; நீ சொன்னது ஆரைக்
கீரையைத் தானடா !
-----------------------------------------------------------------------------------------------------------
சொற்பொருள்:-
எட்டு = 'அ' : கால் = 'வ' ; எட்டேகால் லட்சணம் – அவலட்சணம்; எமன் ஏறும் பரி = எருமைக்கடா;
மட்டில்
பெரியம்மை - மூத்ததேவி என்னும் மூதேவி; வாகனம் – கழுதை; மேல் கூரையில்லா வீடு – குட்டிச்சுவர்; குலராமன்
தூதுவன் – குரங்கு
------------------------------------------------------------------------------------------------------------
பொருள் :-(02)
விரைந்து நடக்கும்
காலழகா !
எம் குலத்தவனே ! வளரும் செல்வமே ! தேவலோகம் போன்றவனே ! உயர்குல வேந்தன் இராமபிரானின்
கதையை காவியமாக்கிய கவிஞனே ! ஆரைக் கீரையை உட் பொருளாக
வைத்து நீ விடுகதையைச் சொன்னாய் ! ஆனால் என்னை நீ வெல்ல
முடியாது !
-------------------------------------------------------------------------------------------------------------
சொற்பொருள்:-
எட்டு + கால் =
எட்டுக்கால் - எட்டேகால் ; எட்டு = கால்களை எட்டிப் போட்டு நடக்கும், லட்சணமே = அழகனே ! (விரைவாக
நடக்கும் வலிமை பொருந்திய கால்களை உடைய அழகனே !) எமன் =
எம்முடைவன் (எம் குலத்தவனே !); ஏறும் பரியே = வளரும் செல்வமே !, முட்ட மேல் கூரை இல்லா வீடே = தலையில் முட்டும்
அளவுக்குத் தாழ்வான மேற்கூரை இல்லாத ; வீடே (அதாவது தேவலோகம் போன்றவனே !)
குலராமன் = உயர்குலத்தில் பிறந்த
வேந்தனான இராமபிரானின்; தூதுவனே = இராமாயணம்
என்னும் இராம காதையை இயற்றி, இராமனின் புகழ் பரப்பும் தூதனே !
ஆரை = ஆரைக் கீரையை; அடா
= உள்ளடக்கி, சொன்னாய் = என்னிடம் விடுகதையைச் சொன்னாய் ; அடா = அடாது.
------------------------------------------------------------------------------------------------------------
”தமிழ்ப்
பணி மன்றம்” முகநூற் குழுவில் வெளியிடப் பெற்ற கட்டுரை.
------------------------------------------------------------------------------------------------------------
ஆக்கம் + இடுகை:
வை.வேதரெத்தினம்,
ஆட்சியர்,
தமிழ்ப்
பணி மன்றம்.
[
தி.ஆ: 2050, சுறவம்,4.]
(18-01-2019}
------------------------------------------------------------------------------------------------------------
