கொத்து
(01) மலர்
(041)
--------------------------------------------------------------------------------------------------------------------------------
புதுக்கோட்டையிலிருந்து இடமாற்றலான
நண்பர்கள் லூக்காசு - உளுந்தூர்ப்பேட்டை, ஜோசப்ராஜ் - கிண்டி,
ஹெர்பட்சன் - மதுரை ஆகியோருக்கு அளிக்கப்பட்ட
தேனீர் விருந்தின் போது நான் ஆற்றிய உரை.
(ஆண்டு 1969)
----------------------------------------------------------------------------------------------------------
அன்புடன் அருள்தவழும் அவைத்தலைவர் அவர்கட்கும் !
அமைதியுடன் எனதுரையைச் செவிமடுக்கும் நண்பர்க்கும் !
இன்றுடன் இம்மனையைத் துறந்துசெலும் தோழர்க்கும் !
இனிமையுடன் சுவையுண்டி ஈங்குதந்த பேரவைக்கும் !
தலைவணங்கிக் கரம்குவித்துத் தருகின்றேன் வணக்கம் !
தகைமையுடன் ஏற்றிடுக ! தமிழ்த்தாயே வாழ்த்து !
----------------------------------------------------------------------------------------------------------------------------------------------
நாற்பத்து நான்குஇதழ் நாற்புறமும் சூழ்ந்தமரை !
நடுவினில் நித்திலமாய் எழிலூட்டும் மணிமேடை !
சேற்றினில் காலூன்றி மலரேந்தும் சிறுதண்டு !
செம்பரிதிச் சுடர்காண செம்மாந்து நிற்கையிலே !
செம்பரிதிச் சுடர்காண செம்மாந்து நிற்கையிலே !
இயக்குநரின் ஆணையெனும் இரைகாற்று தன்கரத்தால்,
இந்நிலையப் பொய்கைதனில் இளநிலவாய்ப் பூத்திருந்த,
மயக்கழகு மாமரையில் மூவிதழைச் சாய்த்துவிட,
மற்றஇதழ் தடுமாறி மனங்கலங்கி வாடுதுகாண் !
ஒடிந்து விழுந்தஇதழ் ஒவ்வொன்றும் ஓடைதனில்,
ஊர்ந்துசெலும் படகாகி உறைவிடமாம் துறைவிலகி,
கடிவிரைவில் வெவ்வேறு உளம்நோக்கிச் சென்றுவிட,
கண்கலங்கித் தாய்மலரும் கவலையுடன் வாடுதுகாண் !
உளுந்தூர்ப் பேட்டையெனும் ஒளிவிளக்கை நாடுதொன்று !
உவர்க்கடலின் ஓரமுள கிண்டிதனைத் தேடுதொன்று !
வளைநரல் மணிமாடம் வானுயர்ந்த மாமதுரை !
வளம்காண வேட்கையுடன் விரைந்திடுது பிறிதொன்று !
வெள்ளி நிலவுருக்கி வெண்கரும்புச் சாறூற்றி,
வார்த்து எடுத்தமுது வழங்குபெயர் லூக்காசு !
தெள்ளுத் தமிழறிவு ; தேன்கவிதை தூங்குமுளம் ,
துள்ளித் துடிப்படையும் தூயமொழிப் பற்றுணர்வு ,
அன்னையாம் தமிழ்மீது அளப்பரிய அருங்காதல் !
அயலூர்தாம் சென்றிடினும் அழியாது அவர்நினைவு !
புன்னையிளம் பூவெடுத்துப் பொறுமையாம் நூலிழையில் ,
பிணித்தமண மலராரம் பெற்றபெயர் ஜோசப்பு !
கண்ணிற் கருமணியாய், கற்பகமாய், பொற்கிழியாய் ,
காத்து வளர்த்தமொழி ! காசினியில் மூத்தமொழி !
விண்ணில் விளையாடும் வெண்ணிலவுக் கன்னிமொழி !
விழிமலரில் இமையாக, வேட்பதுடன் காப்பதலால் ;
அன்னைத் தமிழ்மகவு அவட்காற்றும் நற்பணியென் ?
அவளன்றித் தமிழகத்தில் அறிவொளியும் சுடர்விடுமா ?
என்னும் மெய்ப்பொருளை இலட்சியமாய் ஏந்தியவர் !
எவ்வூரில் வாழ்ந்திடினும் இனிதூறும் அவர்நினைவு !
ஆழிவிளைப் பவழத்தில் அடக்கமாம் மெருகேற்றி ,
அமைதியெனும் பொன்னிழையில் ஆக்கியதோர் மணிமாலை !
தோழமையின் பேருருவம் ; துவளாத அன்புமுகம் !
துணைவராம் ஹெர்பட்சன் தூயநினை வழியாது !
ஆண்டுகள் பலவாக அருமையுடன் பணியாற்றி ,
அன்பினால் எம்முடைய அகமலரில் குளிரூட்டி ,
பண்பிற்கோர் காட்டாகப் பாங்குடனே செயலாற்றி ,
பாசமெனும் கதிர்கொய்துப் பறந்துசெலும் பைங்கிளியீர் !
கத்தும் கடலனையக் கண்காணா தொலையூரில்
கடமைதனை ஆற்றிடவே கடிதுசெலும் கண்மணிகாள் !
குத்து விளக்கெரியும் கோலமிகுத் தீச்சுடரின்
கொழுந்தில் திரியேற்றிக் கொண்டுடனே செல்கின்றீர் !
மெத்தவும் உயர்ந்தகலைக் கோபுரங்கள், ஆலயங்கள் ,
மேவும் இருள்நீக்கி மேதினியில் வாழ்ந்திடுக !
இத்தரணி போற்றிடவே ஏற்றமுடன் நீர்வாழ்க !
இன்பத் தமிழ்காத்து இன்னிசையாய் வாழ்ந்திடுக !
அறிவுக் களஞ்சியமாம் அண்ணாபோல் நீர்வாழ்க !
அகத்தியன் அருட்செல்வி அருந்தமிழாய் வாழியநீர் !
-----------------------------------------------------------------------------------------------------------
-----------------------------------------------------------------------------------------------------------
ஆக்கம்
+ இடுகை,
வை.வேதரெத்தினம்,
[veda70.vv@gmail.com]
ஆட்சியர்,
தமிழ்ப்
பணி மன்றம் முகநூல்.
---------------------------------------------------------------------------------------------------------------------------------
கருத்துகள் இல்லை:
கருத்துரையிடுக
உங்கள் கருத்துகள் வரவேற்கப்படுகின்றன .