நல்வழி (22) பாடுபட்டுத் தேடிப் பணத்தைப் புதைத்து !

உழைத்துச் சேர்த்த செல்வத்தை  நல்வழியில் செலவிடுக  !

ஆத்திச் சூடி, கொன்றை வேந்தன், மூதுரை, ஞானக்குறள், அசதிக் கோவை, பந்தனந்தாதி, நல்வழி ஆகியவை ஔவையார் இயற்றிய நூல்கள். இவற்றுள் நல்வழியிலிருந்து ஒரு செய்யுளைப் பார்ப்போமா !

-----------------------------------------------------------------------------------------------------------

பாடல்.22

-----------------------------------------------------------------------------------------------------------

பாடுபட்டுத் தேடிப் பணத்தைப் புதைத்து வைக்கும்

கேடுகெட்ட மானிடரே கேளுங்கள்  -  கூடுவிட்டிங்

காவிதான் போயினபின் பாரே யநுபவிப்பார்

பாவிகாள் அந்தப் பணம்.

----------------------------------------------------------------------------------------------------------

சந்தி பிரித்து எழுதிய பாடல்

----------------------------------------------------------------------------------------------------------

பாடுபட்டுத் தேடிப் பணத்தைப் புதைத்துவைக்கும்

கேடுகெட்ட மானிடரே கேளுங்கள்  -  கூடுவிட்டுஇங்கு

ஆவிதான் போயினபின்பு யாரே அநுபவிப்பார்

பாவிகாள் அந்தப் பணம்.

---------------------------------------------------------------------------------------------------------

பொருளுரை:

----------------------

பணத்தினை வருந்தி உழைத்துச் சேர்த்து பசியாற உண்ணாமலும், அறவழிச் செயல்களில்  ஈடுபடாமலும், பாதுகாப்புக் கருதி, யாருக்கும் தெரியாமல் பூமியிலே புதைத்து வைக்கின்ற புத்திகெட்ட மனிதர்களே கேட்பீர்களாக ! உங்களுக்குப் பிற்காலம் அந்தப் பணத்தின் பயனை அடையப் போவது யார் என்று உங்களுக்கே தெரியாது ! அப்படி இருக்கையில் எதற்காகச் சேர்த்து வைக்கிறீர்கள் ? உலக வாழ்வை நீப்பதற்கு முன் நற்செயல்களைச் செய்து நல்லவர் என்று பெயர் எடுங்களேன் !

--------------------------------------------------------------------------------------------------------

இன்னொரு கருத்து:

---------------------------------

வருந்தி வருந்தி உழைத்து கோடி கோடியாகச் சேர்த்து அளகைப் (BANK) பாதுகாப்புப் பெட்டகத்தில் தங்கக் கட்டிகளாக மறைத்து வைக்கும் மதிகெட்ட மாந்தர்களே கேளுங்கள் ! வாழும் காலத்தில் அறச் செயல்களுக்குப் பணத்தைப் செலவிட்டு நற்பெயர் ஈட்டுங்கள் ! அதை விடுத்து, அடுத்த தலைமுறைக்குச் சேர்த்து வைக்க விழைவீர்களானால், அந்தப் பணமே உங்கள் கான்முளைகளை (வாரிசுகள்) சோம்பேறிகளாக்கி, உங்கள் குலக்கொடியையே வேரறுத்து வீழ்த்தி விடும் !

----------------------------------------------------------------------------------------------------------

பாடல் எளிய சொற்களில் அமைந்திருப்பதால் அருஞ் சொற்பொருள் தேவையில்லை எனக் கருதி விடப்பட்டுள்ளது.

-----------------------------------------------------------------------------------------------------------

         

 ”தமிழ்ப் பணி மன்றம்” முகநூற் குழுவில் வெளியிடப் பெற்ற

 கட்டுரை

-----------------------------------------------------------------------------------------------------------

ஆக்கம் + இடுகை:

வை.வேதரெத்தினம்,

ஆட்சியர்,

தமிழ்ப் பணி மன்றம்.

[தி.ஆ: 2050, மீனம்,06]

{20-03-2019}

------------------------------------------------------------------------------------------------------------