புதுச் சொல் புனைவோம் !
பயின் = RUBBER.
---------------------------------------------------------------------------------------------------------
ஆலமரம், அத்தி மரம், கருவேல மரம், முருங்கை மரம் போன்ற மரங்களிலிருந்து பால் அல்லது சாறு வடியும் என்பது உங்களுக்குத் தெரியும். இந்தப் பால் உலர்ந்து கெட்டியாகி “பிசின்” கிடைக்கிறது !
அது போலவே இரப்பர் மரத்தின் பட்டையிலிருந்து வடியும் பால், உலர்ந்தால் கெட்டியாகி ”பிசின்” ஆகிறது !
தோட்டங்களில் வளரும் இரப்பர் மரங்களிலிருந்து இரப்பர் பால், குடுவைகளில் சேகரிக்கப் பெற்று, ஆலைகளுக்கு அனுப்பப் பெற்று, சில வேதிப் பொருள்கள் சேர்க்கப்பட்டு, கெட்டியான இரப்பர் பாளங்கள் தயாரிக்கப்படுகின்றன !
இந்தப் பாளங்களை மூலப் பொருளாகக் கொண்டு பலவிதமான பயன்பாட்டுப் பொருள்கள் பல்வேறு ஆலைகளில் உருவாக்குகிறார்கள் !
இரப்பர் பால் பிசு பிசுப்பான ஒரு நீர்மம் (திரவம்). எனவே இதுவும் “பிசின்” தான். ”பிசின்” என்பதைக் குறிக்கும் “பயின்” என்னும் சொல் முன்பு பயன்பாட்டில் இருந்திருக்கிறது. ஆனால் இப்பொழுது வழக்கொழிந்த சொல்லாக ஆகிவிட்டது !
இரப்பர் என்பதைத் தமிழில் எவ்வாறு அழைப்பது ?
“ரப்பர்” என்ற ஆங்கிலச் சொல்லை, சில மொழி பெயர்ப்பாளர்கள் “இரப்பர்” ஆக்கினர். பின்பு “தேய்ப்பான்” “அழிப்பான்” என்றெல்லாம் உரு மாறிற்று. தமிழ் அறிஞர்கள் சிலர் அதை “இழுவை” “தொய்வை” என்றனர் !
இரப்பரின் ”இழுவை” “தொய்வு”த் தன்மைகள் நீக்கப் பெற்று கற்பாறை போல் “தொய்வு” அடையாத, நீட்சி அடையாத பொருள்கள் கூட இக்காலத்தில் தயாரிக்கப்படுகின்றன. எனவே “தொய்வை” என்ற சொல்லுக்கு மாற்றாக வேறு சொல் பயன்படுத்துவது பொருத்தமாக இருக்கும் !
இரப்பர் என்பது, அடிப்படையில், இரப்பர் மரப்பாலில் இருந்து உருவாகும் ”பிசின்” தானே. ”பிசின்” என்பதற்கு இன்னொரு பெயர் தான் “பயின்” “. “பயின்” என்ற தமிழ்ச் சொல்லை இரப்பருக்கு ஏன் சூட்டக்கூடாது. ?
”பயின்” என்ற சொல் சுருங்கிய வடிவினதாகவும், பொருள் பொதிந்ததாகவும், ஒலி நயம் உடையதாகவும் உள்ளது .எனவே இரப்பர் என்பதை இனி “பயின்” என்றே அழைப்போமே !
“பயின்” என்ற சொல்லின் அடிப்படையில் உருவாகும் பிற சொற்களையும் காண்போமா !
=============================================================
| RUBBER | = பயின் |
| RUBBER MAT | = பயின் பாய் |
| RUBBER MATERIALS | = பயின் சரக்குகள் |
| RUBBER TUBE | = பயின் குழல் |
| RUBBER GOODS | = பயின் பொருள்கள் |
| RUBBER FACTORY | = பயினாலை |
| RUBBER ESTATE | = பயின் தோட்டம் |
| RUBBER BELT | = பயின் நாடா |
| RUBBER SHEET | = பயின் தகடு |
| RUBBER STAMP | = பயினச்சு |
| RUBBER BAND | = பயின் வளையம் |
=============================================================
ஆக்கம் + இடுகை,
வை.வேதரெத்தினம்
(veda70.vv@gmail.com)
ஆட்சியர்,
தமிழ்ப் பணி மன்றம் முகநூல்.
==============================================================
ஆகா மிக சிறப்பான சொல்.
பதிலளிநீக்குஇதுபோன்ற புதுமையான சொற்கள் தான் வழக்கத்தில் வரும்.
அருமையான ஆய்வுரை ! மிக்க நன்றி ! நிழற்படம் இணைந்த தங்கள் மின்னஞ்சல் முகவரியுடன், கருத்துரையை அனுப்பி வையுங்கள் ! எனது வலைப் பூவில் தாங்களும் உறுப்பினர் ஆகிட இவை தேவை !
நீக்குஅருமை ! அருமை ! இது போன்ற புதுச் சொற்கள் நிரம்ப வரவேண்டும் ! தொடர்க தங்கள் அரிய பணி !
பதிலளிநீக்குநன்றி!
பதிலளிநீக்கு