உறுமிடத்து உதவாது உவர் நிலம் ஊட்டியும் !
வேண்டிய இடம், வேண்டாத இடம் என்று பாராமல் எல்லா இடங்களிலும் மழையானது பொழிகிறது; அதுபோலவே, பேகன்
தன்னிடம் பரிசில் பெற வருபவர்களிடம் அவர் யார், எளியவரா, இல்லையா, வறியவரா
அல்லவா என்று வேறுபாடு பாராமல் எல்லோர்க்கும் வழங்குவான் !
இவ்வாறு கொடைமடம் கொண்ட பேகன், போர்க்களத்தில், புண்பட்டவர், மூப்பினால்
ஏலாதவர், அகவையிற் சிறியார், புறமுதுகிட்டவர்
ஆகிய யாருடனும் போர்
புரிவதில்லை. போர் விதிகளை மதியாமல் ஒழுகும் படைமடம் கொண்டவனல்லன் என்று
புகழ்ந்து ஒரு பாடலை வடிக்கிறார்.
இதோ அந்தப் பாடல் !
-------------------------------------------------------------------------------------------------------------
புறநானூறு, பாடல் எண்:(142)
-----------------------------------------
அறுகுளத் துகுத்தும் அறுவயற் பொழிந்தும்
உறுமிடத் துதவா துவர்நில மூட்டியும்
வரையா மரபின் மாரி போல
கடாஅ யானைக் கழற்காற் பேகன்
கொடைமடம் படுத லல்லது
படைமடம் படான்பிறர் படைமயக் குறினே !
-------------------------------------------------------------------------------------------------------------
சந்தி பிரித்து எழுதிய பாடல்:
-------------------------------------------------------------------------------------------------------------
அறுகுளத்து உகுத்தும், அறுவயல் பொழிந்தும்,
உறும் இடத்து உதவாது உவர் நிலம் ஊட்டியும்,
வரையா மரபின் மாரி போல,
கடாஅ யானைக் கழற்கால் பேகன்
கொடைமடம் படுதல்
அல்லது,
படைமடம் படான், பிறர் படை மயக்குறினே !
-------------------------------------------------------------------------------------------------------------
பொழிப்புரை:
---------------------
நீர் தேவைப்படும் வறண்ட குளத்திலும் மழை பெய்கிறது; அகன்ற வயல் வெளிகளிலும் பெய்கிறது; நீர் தேவைப்படாத களர் நிலத்திலும் பெய்கிறது ! எங்கு தேவை எனப் பார்த்து மழை பெய்வதில்லை !
அதுபோன்று, பரிசில் பெற வருபவர்கள் எளியவரா, வறியவரா, வளமானவரா
என்று ஆராய்ந்து பாராமல் அனைவர்க்கும் வாரி வழங்கும் கொடைமடம் கொண்டவன் தான் பேகன் !
ஆனால், மதங்கொண்ட யானைப் படைகளையும், வீரக்
கழல் அணிந்த கால்களையும் உடைய பேகன், பகைவர்களின் படைகள்
வந்து களத்தில்
பொருதும் போது போர்
மரபு நெறிகளை மீறமாட்டான்;
அறநெறிக் கொள்கையினின்றும் தவறமாட்டான் !
ஆகவே அவன் கொடைமடம் கொண்டவனாக இருந்தாலும் படைமடம் கொண்டவன் அல்லன் !
------------------------------------------------------------------------------------------------------------
சொற்பொருளுரை:
----------------------------
அறுகுளத்து = வறண்ட குளத்தில்; உகுத்து = பெய்து ; அகல் வயல் = அகன்ற நெல் வயல் வெளிகளில் ; பொழிந்து = பெய்து ; வரையா மரபின் = வரைமுறையின்றிப் பெய்யும் மரபுடைய ; மாரி போல = மழையைப் போல ; கடாஅ யானை = மதங்கொண்ட யானை ; கழற்கால் = வீரக் கழல் அணிந்த கால்களை உடைய ; கொடை மடம் = வரைமுறையின்றிக் கொடுக்கும் அறியாமை ; படைமடம் = போர்க்கள மரபுகளை மீறும் மடமை ; படான் = செய்யமாட்டான்; பிறர் படை = பகைவர்களின் படை ; மயக்குறினே = தாக்குகையில்.
------------------------------------------------------------------------------------------------------------
வை.வேதரெத்தினம்,
[veda70.vv@gmail.com]
ஆட்சியர்,
தமிழ்ப் பணி மன்றம்,
[தி.பி:2051, சிலை (மார்கழி) 26]
(10-01-2021)
------------------------------------------------------------------------------------------------------------
கருத்துகள் இல்லை:
கருத்துரையிடுக
உங்கள் கருத்துகள் வரவேற்கப்படுகின்றன .