கவிதை (31) (1970) கொய்வோம் அருங்கனியாம் அண்ணாவின் ! (வெண்பாக்கள்)

          கொத்து (01)                                                                    மலர் (019)

------------------------------------------------------------------------------------------------------------

      தமிழரசு  இதழுக்கு  “செய்வோம்  சிறந்த

          பல தொண்டு” என்பதை ஈற்றடியாக

                      வைத்து எழுதி அனுப்பிய 
                                வெண்பாக்கள் !

                                                           (ஆண்டு 1970)

------------------------------------------------------------------------------------------------------------

           கொய்வோம்  அருங்கனியாம்  அண்ணாவின்   கருத்துரைகள்

           பெய்வோம்    பிழையறியா    உள்ளமதில்  ---   ஆய்ந்துணர்ந்து

           உய்வோம்;    அவர்சென்ற     உண்மைவழி     நாம்தொடரச்

           செய்வோம்    சிறந்தபல       தொண்டு !

           

           மெய்மைப்   பொருளுணர்ந்து  மேதினியில்     நாம்வாழ

           பொய்மைச்  சுழல்நீந்திப்        போவதலால் --- வாய்மையெனும்

           பாய்மம்      பொங்கிவரப்      பார்மிசையில்   வாழ்வதுடன்

           செய்வோம்  சிறந்தபல          தொண்டு !

           ஏய்க்கும்    நரிமதியில்     எய்திடுவோம்     கூரம்பு

           மாய்க்கும்  வறுமைப்பேய்  மாண்டுவிழ   ---  நாய்க்குணவாய்ப்

           பெய்யும்    கழுநீரைப்       பிச்சைகொளும்  நிலைமாற

           செய்வோம் சிறந்தபல       தொண்டு !

           காஞ்சித்     தவப்புதல்வன்  கண்மணியாம்   அண்ணாபோல்

           வாஞ்சை    மிகக்கொண்டு  வண்டமிழை ---  நெஞ்சமதில்

           ஆய்வோம்;  உயிர்மூச்சாய்  ஆக்கிடுவோம்    மேதினியில்

           செய்வோம்  சிறந்தபல       தொண்டு !

---------------------------------------------------------------------------------------------------------

ஆக்கம் + இடுகை,

வை.வேதரெத்தினம்,

[veda70.vv@gmail.com]

ஆட்சியர்,

தமிழ்ப் பணி மன்றம் முகநூல்.

--------------------------------------------------------------------------------------------------------------------------------

கவிதை (30) (1970) பொழுதெழில் புலர்ந்து வரும் ! (பொங்கல் வாழ்த்துக் கவிதை)

                 கொத்து (01)                                             மலர் (017)

==============================================================

               புதுக்கோடையில் பூத்த பொங்கல் மலர் !

                                                     (ஆண்டு 1970)

                                   பொங்கல் வாழ்த்து !

                       [ இது ஒரு கிராமத்துக் காட்சி ]

=====================================================

                      

                       பொழுதெழில்       புலர்ந்துவரும் !

                           புள்ளினங்கள்        ஆர்த்துஎழும் !

                                பொற்கதிர்கள்       மேலெழுந்துப்

                                     பூவுலகை           ஊடுறுவும் !

                      தாழைமடல்        தூளிவிழும் !

                           தண்ணிலவும்       நாணியெழும்: !

                                தரணியெலாம்      வான்பனியைத்

                                     தழுவியுடல்        மீமகிழும் !

                      கருங்குருவிக்       கூச்சலிடும் !

                           கட்டவிழும்         மொட்டிதழும் !

                                காரிகையர்         கற்பனையில்

                                     கைவளரும்        கோலம்மிகும் !

                      வரம்புகளில்        பரங்கிமலர்

                           வான்பார்த்துப்       நகைமுகிழும் !

                                வண்டுகளின்        ஊங்காரம்

                                     வாழ்த்தோதும் கதிரசையும் !

                      கன்றுகளை   நினைந்துருகும்,

                           கறவைகள்     பால்சொரியும் !

                                கட்டவிழ்த்து   விடப்பட்டக்

                                     காளையெக்கர்  மீதுலவும் !!

                      சென்றுவருக   வருகவெனச்

                           செங்காந்தள்   கையசைப்பாள் !

                                சிரந்தாழ்த்தி   மார்கழியாள்

                                     சென்றிடுவாள், தைவருவாள் !

                      ஏடணையாய்   நெல்சொரிந்து

                           இவ்வுலகைக்  காத்திடுவாள் !

                                ஏரோட்டும்     கைப்பிடித்துப்

                                     பாராட்டிச்      சீர்தருவாள் !

                      நன்மைகளைத் ”தை”தருவாள் !

                           நாமவளைப்   போற்றிடுவோம் !

                                 நாவினிக்கப்    பொங்கலிட்டு

                                      நன்றிசொலி;  வாழ்த்திடுவோம் !!

============================================================

ஆக்கம் + இடுகை,

வை.வேதரெத்தினம்,

[veda70.vv@gmail.com]

ஆட்சியர்,

தமிழ்ப் பணி மன்றம் முகநூல்.

 -------------------------------------------------------------------------------------

கவிதை (29) (1970) பால்நிலவு கார்முகிலில் பதுங்கி ! (ஓவியத்துக்கு ஒரு பாட்டு)

           கொத்து (01)                                                                               மலர் (029)

=========================================================================

     குமுதத்தில் வெளிவந்த கடல் புறா தொடர்கதைக்காக 

     வரையப்பட்ட ஓவியத்தை மையமாக வைத்து 

   எழுதப்பட்ட ஓர் கவிதை !

                                      (ஆண்டு 1970)

==============================================

            பால்நிலவு    கார்முகிலில்  பதுங்கிவிளை   யாடும் ! – அதன்

                பார்வைதனில்  நின்வதனம்  பவளநிறம்  வீசும் !

            கோலமயில்  சோலைதனில்  தோகைவிரித்   தாடும் ! – உன்

                குவளைவிழிப்  பூமலர்ந்து  கோடிமொழி  பேசும் !

            குமுதமலர்    ஓடைதனில்   நீர்த்திரையி    லாடும் !  - நின்

                கொவ்வையிதழ்  ஏக்கமுறக்  கூம்பிமுகம்  வாடும் !

            அமுதமொழிப்  பைங்கிளியே !  ஆழ்கடல்நல்  முத்தே ! – நின்

                ஆசைமுகம்  காணவுளம்  அலைந்திடுதல்  ஏனோ ?

            காரணத்தை    நானறியேன்    கனிமொழியே !  நின்பால்

                கருணைகொண்ட   எனதுநெஞ்சு   கலங்கிதடு    மாறி !

            ஆரணங்கு    நின்னிதயப்      பூங்குடிலில்      ஏறி !

                அன்புகாண    ஏங்குவதேன் ?     ஆருயிரே      கூறு !

            கூறுவதைக்   கூறுநின்   குயில்மொழியாற்     கூறு !

                கொன்றைமலர்  மேனியளே !     கூறுவதைக்    கூறு !

            நாறுகின்ற   நறுமுல்லை   மல்லிகையைப்     போல !

                நகைமுறுவல்   காட்டுகின்ற      நங்கையேநீ    கூறு !

------------------------------------------------------------------------------------------------------------

ஆக்கம் + இடுகை,

வை.வேதரெத்தினம்,

[veda70.vv@gmail.com]

ஆட்சியர்,

தமிழ்ப் பணி மன்றம் முகநூல்.

-------------------------------------------------------------------------------------------------------------------------

கவிதை (28) (1970) நீலத் திரைவானில் நீந்திவரும் ! (படத்தை வைத்துப் பாடல்)

             கொத்து (01)                                                                                       மலர் (028)

===========================================================================

           குமுதம் இதழில் வெளியான ஒரு படத்தை  வைத்துக்                   கொண்டு எழுதிய   ஒரு  கவிதை !

   (ஆண்டு 1970)

=========================================

           

            நீலத்  திரைவானில்  நீந்திவரும்  வெண்மதிபோல்

                நின்வதனம்  தோன்றுவதேன் ?  நிலவு முகத்தினிடை

            சேலிரண்டு  துள்ளுவதேன் ?  செந்தமிழின்  காவலனாம்

                சேரன் புகழ்பாடிச்  செங்கோட்டை மீதுயர்ந்த

            

            பட்டுத்  துகிற்கொடியில்  பறித்து  எடுத்ததுவோ !

                பைங்கொடியாள்  நின்புருவம் ? பவளத்துப் பாறைதனில்,

            வெட்டி எடுத்ததுவோ  வேல்விழியாள் நின்னிதழ்கள் ?

                வெள்ளை நறுமுல்லை  வெட்கித் தலைகுனிய,

            

            முத்து  மணிகொண்டு  கோத்ததுவோ பல்வரிசை ?

                முக்கனியின்  சாறெடுத்து ஆக்கியதோ  கன்னங்கள் ?

            கத்து  கடலனையக்  காட்சிதரும்  கருங்கூந்தல்,

                கார்முகிலின்  சொத்தலவோ ? காரிகைநீ  கொண்டதுஏன் ?

            

            தேன்கதலித்  தண்டினிலே  வடித்ததுவோ நின்மேனி ?

                தீங்கரும்புத்  துண்டாமோ  சேயிழையாள்  நின்கரங்கள் ?

            அன்னத்தின் சிறகெடுத்து ஆக்கியதோ  சீரடிகள் ?

                அஞ்சுகமும் பூங்குயிலும்  அடைக்கலமோ  நின்னிடமே ?

            

            பொதியமலைத்  தென்றலிடைப் பூங்கொடிகள் ஆடுதல்போல்,

                புன்னகையின்  ஆட்சிதனில்  பொன்மலர்நீ  ஆடுதலால்,

            மதுவூறும்  மாமலரே !  மான்மறியே !  பூம்பொழிலே !

                மல்லிகையே ! இன்றுமுதல்  பூங்கொடியே நின்பெயராம் !

            

             பூங்கொடியே  நீவாழ்க !!  நின்முறுவல்  நனிவாழ்க !

                பொன்மணியே நீவாழ்க ! நின்மனைவாழ்க ! வாழியவே !

----------------------------------------------------------------------------------------------------------

ஆக்கம் + இடுகை,

வை.வேதரெத்தினம்,

[veda70.vv@gmail.com]

ஆட்சியர்,

தமிழ்ப் பணி மன்றம் முகநூல்.

-------------------------------------------------------------------------------------------------------------------------