ஆற்றில் உண்டாகும் மேடு பள்ளங்களைப் போன்றது செல்வம் !
ஔவையார் அருளிச் செய்த பாடல்கள் எல்லாம்
இனிய வாழ்க்கைக்கு புதிய பாதை அமைத்துத் தருவன. செல்வத்தின் நிலையாமை பற்றி நல்வழி என்னும் நூல்
வாயிலாக ஔவையார் அருளிய
ஒரு பாடல் இதோ !
------------------------------------------------------------------------------------------------------------
பாடல்.32.
-------------------------------------------------------------------------------------------------------------
ஆறிடு
மேடும் மடுவும்போ லாஞ்செல்வம்
மாறிடு
மேறிடும் மாநிலத்தீர் - சோறிடுஞ்
தண்ணீரும்
வாரும் தருமமே சார்பாக
உண்ணீர்மை
வீறு முயர்ந்து.
------------------------------------------------------------------------------------------------------------
சந்தி
பிரித்து எழுதிய பாடல்
------------------------------------------------------------------------------------------------------------
ஆறிடும்
மேடும் மடுவும் போல் ஆம் செல்வம்
மாறிடும்
ஏறிடும் மாநிலத்தீர் - சோறு இடும்
தண்ணீரும்
வாரும் தருமமே சார்பு ஆக
உண்ணீர்மை
வீறும் உயர்ந்து.
-----------------------------------------------------------------------------------------------------------
அருஞ்சொற்பொருள்:
------------------------------------
மாநிலத்தீர் = இந்தப்
பெரிய பூமியில் வாழும் மாந்தர்களே ! ஆறு இடும் மேடும் மடுவும்
போல் = ஆற்று வெள்ளத்தினால் உண்டாக்கப்படும் மணல் மேடும் பள்ளமும்
போல; செல்வம் ஏறிடும் மாறிடும் = செல்வம்
வளர்வதும் தேய்வதுமாய் இருக்கும் ; (ஆதலினால்) சோறு இடும் = இரந்து வருவோர்க்கு சோறு இடுங்கள் ; தண்ணீரும் வாரும் = (பருகுதற்கு நல்ல) தண்ணீரையும் வார்த்திடுங்கள் (கொடுங்கள்) ; தருமமே சார்பு ஆக = (இப்படிச் செய்து வருவீர்களானால்)
இந்தத் தருமமே துணையாக ; உள்நீர்மை உயர்ந்து வீறும்
= உள்ளத்திலே தூய தன்மை ஓங்கி விளங்கும். (போல்
ஆம் என்பதில் வரும் ஆம் என்பது அசைச் சொல். இதற்குப் பொருள் காண
வேண்டியதில்லை)
-----------------------------------------------------------------------------------------------------------
பொருளுரை:
----------------------
இந்தப் பூவுலகில் வாழும் மாந்தர்களே ! கேளுங்கள்
! ஆற்று வெள்ளத்தினால் உண்டாக்கப்படும் மணல் மேடுகளும் தாழ்வான பள்ளங்களும்
போல உங்களிடம் உள்ள செல்வமும் வளர்வதும் தேய்வதுமான குணங்களை உடையது. ஆகையால், இத்தகைய நிலையற்ற செல்வம் மீது ஆசை வைக்காமல்,
அறவழியில் உங்கள் சிந்தனையைச் செலுத்துங்கள்; இரவலர்களின்
பசித்த வயிற்றுக்குச் சோறு இடுங்கள். அவர்கள் பருகுதற்கு நல்ல
தண்ணீரும் கொடுங்கள்; இப்படிச் செய்து வருவீர்களானால்,
இந்தத் தருமமே உங்களுக்கு என்றும் துணை நிற்கும். உள்ளமும் தூய தன்மை உடையதாக ஓங்கி விளங்கும் !
-----------------------------------------------------------------------------------------------------------
”தமிழ்ப் பணி மன்றம்” முகநூற் குழுவில்
வெளியிடப் பெற்ற
கட்டுரை
------------------------------------------------------------------------------------------------------------
ஆக்கம் + இடுகை:
வை.வேதரெத்தினம்,
ஆட்சியர்,
தமிழ்ப்
பணி மன்றம்.
[தி.ஆ:2050,மீனம்,20]
{03-04-2019}
-----------------------------------------------------------------------------------------------------------
கருத்துகள் இல்லை:
கருத்துரையிடுக
உங்கள் கருத்துகள் வரவேற்கப்படுகின்றன .