தமிழ்ப் பணி மன்றம்: புதிய தமிழ்ச் சொல் (10) குயிலி ( DRILL BIT )

புதுச்சொல் புனைவோம் !

குயிலி - DRILL BIT

-----------------------------------------------------------------------------------------------------

மரத்தில் துளை இடுவதற்குத் துரப்பணம் என்ற கருவி பயன்படுவது போல் இரும்பில் துளையிட, டிரில் பிட் (Drill Bit) என்ற கருவி பயன் படுகிறது. இந்தக் கருவியைத் தமிழில் எவ்வாறு அழைப்பது ? சிலர் துளையுளி என்கின்றனர். வேறு சிலர் துளையிடும் கருவி என்கின்றனர். இன்னும் சிலர் துளைப்பான் என்கின்றனர் !

புதிதாக ஒரு சொல் உருவாக்கும் போது, அது சுருங்கிய வடிவினதாகவும், பொருள் பொதிந்ததாகவும், ஒலி நயம் உடையதாகவும் அமைந்தால் அச்சொல் நிலைத்து நிற்கும் !

முற்காலத்தில், முத்துக்களை மாலையாகக் கோப்பதற்கு வசதியாக அதில் மெல்லிய துளை வழி ( through hole ) இடுவது வழக்கம். இத்தகைய துளையிடும் பணியைச் செய்தோர் “ குயினர் “ என்று அழைக்கப் பட்டனர். “ குயிலல் “ செய்தவர்கள் “ குயினர் “ ஆயினர். ” குயில் ‘ , “ குயிலல் “ , “ குயிலுதல்” என்ற சொற்கள் எல்லாம் “ துளைத்தல் “என்பதைக் குறிக்கும் சொற்களே !

"குன்று குயின்றன்ன அந்தணர் பள்ளியும்“ என்பது மதுரைக் காஞ்சி என்னும் இலக்கியத்தில் வரும் பாடல் வரி ! (வரி : 474)

”கோடுபோழ் கடைநரும், திருமணிக் குயினரும்...” என்பதும் இதே இலக்கியத்தில் இடம் பெற்றுள்ள பாடல் வரி ! (வரி: 511)

” குன்று குயின்றன்ன ஓங்கு நிலை வாயில் “ என்று நெடுநல் வாடை என்னும் இலக்கியமும் பேசுகிறது ! ( வரி: 88)

“ குயில் “ ( துளைத்தல் ) என்னும் வினையப் புரிகின்ற கருவியை “ குயிலி “ என்று கூறுதல் பொருத்தமாக அமையும் அல்லவா ? இனிமேல் டிரில் பிட் (Drill Bit) என்பதை “ குயிலி “ என்றே அழைப்போமே !! சுருங்கிய வடிவம் ; ஒலி நயம் ; பொருள் ஆழம் . வேறு என்ன வேண்டும் ?

”குயிலி” என்னும் சொல்லின் அடிப்படையில் உருவாகும் பிற சொற்களையும் பாருங்களேன் !!!

===========================================================

DRILL BIT..............................	= குயிலி
STRAIGHT SHANK DRILL BIT............................................	= செங்காற் குயிலி
TAPPER SHANK DRILL BIT	= கணைக்காற் குயிலி
TWIST DRILL........................	= சுழற் பீலிக் குயிலி
COMBINATION CENTER DRILL......................................	= குழிப்புக் குயிலி
DRILL CHUCK......................	= குயிலிச் சிமிழி
DRILL BRACE......................	= குயிலிச் சூரல்
DRILLING MACHINE..........	= குயிற் பொறி
HAND DRILLING MACHINE	= கைவலக் குயிற் பொறி
BENCH DRILLING MACHINE...............................	= விசிக் குயிற் பொறி
PILLAR DRILLING MACHINE...............................	= நிலைக் குயிற் பொறி
RADIAL DRILLING MACHINE...............................	= சுழலியல் குயிற் பொறி